ᱱᱚᱣᱟ ᱫᱷᱟᱹᱨᱛᱤ ᱨᱮ ᱢᱤᱼᱢᱩᱫ ᱚᱠᱛᱚ ᱢᱤᱼᱢᱤᱫ ᱴᱟᱝ ᱢᱟᱹᱱᱢᱤ ᱠᱚ ᱡᱟᱱᱟᱢᱚᱜᱼᱟ, ᱡᱟᱸᱦᱟᱭ ᱠᱚᱣᱜ ᱥᱤᱨᱡᱟᱹᱣ ᱫᱟᱲᱮᱛᱮ ᱢᱤᱼᱢᱤᱫ ᱴᱟᱝ ᱱᱚᱣᱟ ᱱᱟᱜᱟᱢ ᱠᱚ ᱛᱮᱭᱟᱨ ᱦᱚᱴᱚ ᱠᱟᱜᱼᱟ। ᱡᱟᱸᱦᱟ ᱱᱟᱜᱟᱢ ᱛᱟᱞᱟ ᱛᱮᱫᱚ ᱡᱟᱭ ᱡᱩᱜ ᱠᱚ ᱩᱭᱦᱟᱹᱨᱚᱜᱼᱟ। ᱱᱚᱝᱠᱟᱱᱤᱢ ᱜᱮ ᱢᱤᱫ ᱦᱚᱲ ᱵᱚᱱ ᱧᱟᱢ ᱞᱮᱫᱮᱭᱟ ᱠᱷᱮᱚᱣᱟᱞ ᱥᱟᱶᱛᱟ ᱨᱮ।

ᱩᱱᱤ ᱫᱚᱭ ᱦᱳᱭᱳᱜ ᱠᱟᱱᱟ ᱯᱟᱹᱨᱥᱤ ᱥᱤᱧ ᱪᱟᱸᱫᱳ , ᱚᱞ ᱜᱩᱨᱩ, ᱜᱩᱨᱩ ᱜᱚᱢᱠᱮ ᱯᱚᱸᱰᱮᱛ ᱨᱟᱹᱜᱷᱩᱱᱟᱛᱷ ᱢᱩᱨᱢᱩ। ᱩᱰᱤᱥᱥᱟ ᱯᱚᱱᱚᱛ ᱨᱮ ᱢᱮᱱᱟᱜ ᱢᱚᱭᱩᱨᱵᱷᱚᱧᱡᱽ ᱡᱤᱞᱟᱹ ᱨᱮᱭᱟᱜ ᱰᱟᱦᱟᱨᱰᱤ ᱟᱹᱛᱩ ᱨᱮ। ᱜᱩᱨᱩ ᱜᱚᱢᱠᱮ ᱯᱚᱸᱰᱮᱛ ᱨᱟᱹᱜᱷᱩᱱᱟᱛᱷ ᱢᱩᱨᱢᱩ ᱫᱚ ᱵᱟᱹᱭᱥᱟᱹᱛ ᱵᱚᱸᱜᱟ ᱠᱩᱱᱟᱹᱢᱤ ᱨᱮ ᱤᱝᱨᱮᱡᱤ ᱑᱙᱐᱕ ᱥᱟᱞ ᱨᱮᱭᱟᱜ ᱕ ᱢᱮ ᱢᱟᱺᱦᱤᱛ ᱦᱤᱞᱚᱜ ᱮ ᱡᱟᱱᱟᱢ ᱞᱮᱱᱟ। ᱟᱯᱟᱛ ᱧᱩᱛᱩᱢ ᱫᱚ ᱛᱟᱸᱦᱮ ᱠᱟᱱ ᱛᱟᱭᱟ ᱱᱚᱱᱫᱚᱞᱟᱞ ᱢᱩᱨᱢᱩ ᱟᱨ ᱟᱭᱳ ᱧᱩᱛᱩᱢ ᱫᱚ ᱥᱚᱞᱢᱟ ᱢᱩᱨᱢᱩ।

ᱞᱟᱹᱭ ᱪᱟᱞ ᱠᱟᱛᱷᱟ ᱞᱮᱠᱟᱛᱮ ᱵᱟᱰᱟᱭ ᱧᱟᱢᱚᱜᱼᱟ ᱜᱤᱫᱽᱨᱟᱹ ᱩᱢᱮᱨ ᱡᱚᱦᱚᱜ ᱯᱚᱸᱰᱮᱛ ᱨᱟᱹᱜᱷᱩᱱᱟᱛᱷ ᱢᱩᱨᱢᱩ ᱫᱚ ᱠᱷᱮᱨᱚᱣᱟᱞ ᱥᱟᱶᱛᱟ ᱨᱮᱭᱟᱜ ᱥᱮᱨᱚᱣᱟ ᱞᱮᱠᱟᱛᱮ ᱟᱡ ᱜᱚᱲᱚᱢ ᱦᱟᱲᱟᱢᱟᱜ ᱧᱩᱛᱩᱢ 'ᱪᱩᱱᱩ' ᱜᱮᱠᱚ ᱧᱩᱢ ᱞᱮᱫᱮᱭᱟ।

ᱢᱮᱱᱠᱷᱟᱱ ᱜᱤᱫᱽᱨᱟᱹ ᱩᱢᱮᱨ ᱨᱮ ᱱᱩᱭ ᱫᱚ ᱟᱹᱰᱤ ᱡᱳᱨᱮ ᱨᱩᱣᱟᱹ ᱦᱟᱥᱳᱜ ᱛᱟᱸᱦᱮᱫ ᱟᱭ, ᱟᱱᱟᱛᱮ ᱟᱠᱚ ᱟᱹᱛᱩ ᱨᱮᱱᱤᱡ ᱜᱮ ᱢᱤᱫ ᱚᱡᱷᱟ ᱦᱟᱲᱟᱢᱟᱜ ᱧᱩᱛᱩᱢ 'ᱨᱚᱜᱷᱩ' ᱜᱮᱠᱚ ᱧᱩᱢ ᱦᱟᱞᱟᱝ ᱟᱫᱮ ᱛᱟᱸᱦᱮᱫ। ᱩᱱ ᱠᱷᱚᱱ ᱜᱮ ᱱᱩᱭ ᱟᱜ ᱧᱩᱛᱩᱢ ᱫᱚ ᱨᱚᱜᱷᱩᱱᱟᱛᱷ ᱢᱩᱨᱢᱩ ᱥᱮ ᱨᱟᱹᱜᱷᱩᱱᱟ ᱢᱩᱨᱢᱩ ᱢᱮᱱᱛᱮᱭ ᱪᱷᱟᱹᱴᱭᱟᱨ ᱮᱱᱟᱭ।

ᱮᱭᱟᱭ ᱥᱮᱨᱢᱟ ᱩᱢᱮᱨ ᱨᱮ ᱱᱩᱭ ᱫᱚ ᱜᱟᱸᱵᱷᱟᱹᱨᱤᱭᱟᱹ U.P. SCHOOL ᱨᱮᱠᱚ ᱥᱮᱞᱮᱫ ᱞᱮᱫᱮᱭ। ᱚᱱᱟ ᱤᱛᱩᱱ ᱟᱥᱲᱟ ᱨᱮᱫᱚ ᱩᱲᱤᱭᱟᱹ ᱯᱟᱹᱨᱥᱤ ᱛᱮᱠᱚ ᱯᱟᱲᱦᱟᱣ ᱠᱚ ᱛᱟᱸᱦᱮᱫ। ᱚᱱᱟᱛᱮ ᱨᱟᱹᱜᱷᱩᱱᱟᱛᱷ ᱫᱚ ᱥᱟᱱᱛᱟᱲᱤ ᱯᱟᱹᱨᱥᱤ ᱵᱮᱜᱚᱨ ᱚᱠᱟ ᱦᱚᱸ ᱵᱟᱭ ᱵᱩᱡ ᱛᱟᱸᱦᱮᱫ। ᱟᱭᱟᱜ ᱢᱚᱱᱮᱨᱮ ᱟᱹᱰᱤ ᱞᱮᱠᱟᱱ ᱠᱩᱠᱞᱤ ᱥᱮᱴᱮᱨ ᱟᱫᱮᱭᱟ। ᱱᱚᱣᱟ ᱜᱮᱭ ᱟᱸᱜᱚᱢ ᱧᱟᱢ ᱞᱮᱫᱟ ᱡᱮ ᱥᱟᱱᱛᱟᱲᱤ ᱯᱟᱹᱨᱥᱤ ᱛᱮᱫᱚ ᱚᱞᱚᱜ ᱯᱟᱲᱦᱟᱣ ᱨᱮᱭᱟᱜ ᱰᱟᱦᱟᱨ ᱫᱚ ᱵᱟᱱᱩᱜ ᱟᱠᱟᱫᱟ।

ᱚᱱᱟᱛᱮ ᱱᱩᱭ ᱫᱚ ᱥᱟᱱᱛᱟᱲᱤ ᱯᱟᱹᱨᱥᱤ ᱛᱮ ᱚᱞᱚᱜ ᱯᱟᱲᱦᱟᱣ ᱧᱟᱢ ᱞᱟᱜᱤᱫ ᱫᱚ ᱟᱹᱰᱤ ᱡᱳᱨ ᱜᱮ ᱟᱸᱥ ᱛᱟᱸᱦᱮ ᱠᱟᱱ ᱛᱟᱭᱟ। ᱑᱙᱑᱓ ᱥᱟᱞ ᱨᱮ ᱜᱟᱸᱵᱷᱟᱹᱨᱤᱭᱟᱹ U.P. SCHOOL ᱨᱮᱭᱟᱜ ᱯᱟᱲᱦᱟᱣ ᱠᱟᱹᱢᱤ ᱢᱩᱪᱟᱹᱫ ᱛᱟᱭᱱᱚᱢ ᱱᱩᱭ ᱫᱚ ᱵᱚᱦᱚᱲᱫᱟ M.E. SCHOOL ᱨᱮ ᱛᱮᱥᱟᱨ ᱪᱟᱱᱟᱪ ᱨᱮᱭ ᱥᱮᱞᱮᱫ ᱮᱱᱟ। ᱱᱚᱰᱮ ᱯᱟᱲᱦᱟᱣᱼᱟᱜ ᱠᱟᱱ ᱚᱠᱛᱚᱜᱮ ᱵᱟᱱᱟᱰᱩᱝᱜᱽᱨᱤ ᱧᱩᱛᱩᱢᱟᱱ ᱟᱹᱛᱩ ᱥᱤᱢᱟᱹᱨᱮ ᱢᱤᱫᱴᱟᱝ ᱰᱮᱨᱟ ᱚᱲᱟᱜ ᱨᱮ ᱜᱟᱛᱮ ᱠᱚ ᱥᱟᱞᱟᱜ ᱮ ᱛᱟᱸᱦᱮ ᱠᱟᱱᱟ।

ᱱᱚᱰᱮ ᱛᱟᱸᱦᱮᱱ ᱚᱠᱛᱚ ᱜᱮ 'ᱵᱤᱫᱩᱼᱪᱟᱸᱫᱟᱱ' ᱛᱟᱠᱤᱱ ᱫᱚ ᱠᱩᱠᱢᱩ ᱛᱮᱭ ᱧᱟᱢ ᱞᱮᱫ ᱠᱤᱱᱟᱭ। ᱠᱩᱠᱢᱩ ᱛᱮᱠᱤᱱ ᱢᱮᱛᱟᱭ ᱠᱟᱱᱟ "ᱥᱟᱱᱛᱟᱲᱤ ᱯᱟᱹᱨᱥᱤ ᱪᱟᱨᱪᱟᱣ ᱠᱟᱹᱢᱤ ᱨᱮ ᱫᱷᱩᱨᱟᱹᱣ ᱞᱮᱱ ᱠᱷᱟᱱᱮᱢ ᱡᱤᱭᱚᱱ ᱨᱮ ᱟᱹᱰᱤ ᱢᱟᱨᱟᱝ ᱜᱚᱱᱚᱝ ᱟᱱᱟᱜ ᱮᱢ ᱧᱟᱢ ᱫᱟᱲᱮᱭᱟᱜᱼᱟ।" ᱱᱚᱣᱟ ᱠᱟᱛᱷᱟ ᱵᱟᱰᱟᱭ ᱛᱟᱭᱱᱚᱢ ᱠᱷᱚᱱ ᱥᱟᱱᱛᱟᱲᱤ ᱯᱟᱹᱨᱥᱤ ᱪᱟᱨᱪᱟᱣ ᱠᱟᱹᱢᱤ ᱫᱚᱭ ᱮᱛᱚᱦᱚᱵ ᱞᱮᱫᱟ। ᱤᱱᱟᱹ ᱛᱟᱭᱱᱚᱢ N.K.G. SCHOOL ᱨᱮᱭ ᱥᱮᱞᱮᱫ ᱮᱱᱟ।

ᱱᱚᱣᱟ ᱛᱟᱭᱱᱚᱢ ᱱᱩᱭ ᱫᱚ BARIPADA HIGH SCHOOL ᱨᱮᱭ ᱥᱮᱞᱮᱫ ᱮᱱᱟ ᱛᱩᱨᱩᱭ ᱪᱟᱱᱟᱪ ᱨᱮ। ᱑᱙᱒᱔ ᱥᱟᱞ ᱨᱮ ᱱᱚᱰᱮ ᱠᱷᱚᱱ ᱜᱮ ᱢᱮᱴᱨᱤᱠ ᱫᱚᱭ ᱯᱟᱨᱚᱢ ᱞᱮᱫᱟ। ᱚᱲᱟᱜ ᱨᱮᱭᱟᱜ ᱟᱱᱟᱴ ᱠᱚ ᱠᱷᱟᱹᱛᱤᱨ ᱪᱮᱛᱟᱱ ᱪᱟᱱᱟᱪ ᱞᱟᱹᱜᱤᱫ ᱛᱮ ᱯᱟᱲᱦᱟᱣ ᱨᱮᱭᱟᱜ ᱟᱸᱥ ᱛᱟᱸᱦᱮ ᱠᱟᱛᱮ ᱦᱚᱸ ᱚᱞᱚᱜ ᱠᱟᱹᱢᱤ ᱫᱚ ᱱᱚᱰᱮ ᱜᱮ ᱦᱳᱭ ᱞᱮᱱ ᱛᱟᱭᱟ।

ᱥᱟᱱᱛᱟᱲᱤ ᱯᱟᱹᱨᱥᱤ ᱪᱟᱨᱪᱟᱣ ᱠᱟᱹᱢᱤ ᱫᱚ ᱞᱮᱛᱟᱲ ᱜᱮ ᱪᱟᱞᱟᱣ ᱤᱫᱤᱠᱮᱫ ᱛᱟᱭᱟᱭ। ᱑᱙᱒᱕ ᱥᱟᱞ ᱨᱮ ᱥᱟᱱᱛᱟᱲᱤ ᱯᱟᱹᱨᱥᱤ ᱡᱚᱛᱷᱟᱛ ᱞᱮᱠᱟᱛᱮ ᱚᱞ ᱥᱚᱫᱚᱨ ᱞᱟᱹᱜᱤᱫ ᱛᱮ 'ᱚᱞ ᱪᱤᱠᱤ' ᱫᱚᱭ ᱥᱤᱨᱡᱟᱹᱣ ᱠᱮᱫᱟ। ᱱᱚᱣᱟ ᱜᱮ ᱟᱭᱟᱜ ᱡᱤᱭᱚᱱ ᱨᱮᱭᱟᱜ ᱥᱚᱨᱮᱥ ᱠᱟᱹᱢᱤ ᱠᱟᱱ ᱛᱟᱭᱟ। ᱠᱷᱮᱨᱚᱣᱟᱞ ᱥᱟᱶᱛᱟ ᱨᱮᱱ ᱦᱚᱲᱼᱦᱚᱯᱚᱱ ᱠᱚᱣᱟᱜ ᱱᱟᱣᱟ ᱠᱟᱨᱛᱮ ᱢᱮᱫ ᱵᱩᱥᱟᱹᱲᱮᱱ ᱛᱟᱠᱚᱣᱟ।

ᱯᱚᱸᱰᱮᱛ ᱨᱟᱹᱜᱷᱩᱱᱟᱛᱷ ᱢᱩᱨᱢᱩ ᱜᱚᱢᱠᱮ ᱟᱜ ᱧᱩᱛᱩᱢ ᱫᱤᱥᱚᱢ ᱫᱤᱥᱚᱢ ᱯᱟᱥᱱᱟᱣ ᱮᱱ ᱛᱟᱭᱟ। ᱑᱙᱓᱑ ᱥᱟᱞᱨᱮ ᱦᱚᱲ ᱞᱮᱠᱷᱟ ᱠᱟᱹᱢᱤ ᱨᱮᱭ ᱫᱷᱩᱨᱟᱹ ᱞᱮᱱᱟ। ᱟᱨ ᱱᱚᱣᱟ ᱚᱠᱛᱚ ᱜᱮ ᱠᱩᱪᱩᱝ ᱫᱤᱥᱚᱢ ᱡᱟᱢᱛᱳᱲᱟ ᱟᱹᱛᱩ ᱨᱤᱱᱤᱡ ᱢᱟᱹᱭ ᱱᱚᱦᱟ ᱥᱟᱶ ᱥᱟᱹᱜᱩᱱ ᱵᱟᱯᱞᱟ ᱫᱚ ᱦᱳᱭ ᱥᱟᱹᱛ ᱮᱱ ᱠᱷᱟᱱ ᱜᱮ ᱜᱷᱟᱸᱨᱚᱧᱡᱽ ᱠᱟᱹᱢᱤ ᱨᱮᱭ ᱫᱷᱩᱨᱟᱹᱣ ᱮᱱᱟ।

᱑᱙᱓᱒ ᱥᱟᱞᱨᱮ BARIPADA PAWER HOUSE ᱠᱷᱚᱱ APPRENTICE DIPLOMA ᱠᱚᱨᱟᱣ ᱞᱮᱫᱟᱭ। ᱪᱟᱠᱨᱤ ᱨᱮ ᱢᱚᱱᱮ ᱵᱟᱭ ᱚᱨᱞᱮᱫ ᱛᱟᱭᱛᱮ ᱚᱲᱟᱜ ᱨᱮᱜᱮ ᱞᱩᱜᱽᱲᱤ ᱛᱮᱹᱛᱮᱹᱧ ᱮ ᱮᱦᱚᱵ ᱠᱮᱫᱟ। ᱟᱭᱟᱜ ᱱᱚᱣᱟ ᱠᱟᱹᱢᱤ ᱧᱮᱞ ᱛᱮ ᱨᱟᱹᱥᱠᱟᱹ ᱠᱟᱛᱮ ᱩᱲᱤᱥᱥᱟ ᱨᱮᱱᱤᱡ ᱢᱚᱦᱟᱨᱟᱡᱟ ᱯᱨᱚᱛᱟᱯ ᱪᱚᱱᱫᱨᱚ ᱵᱷᱚᱧᱡᱚᱫᱮᱣ ᱤᱡ ᱫᱮᱣᱟᱱ P. K. SEN ᱟᱜ ᱩᱫᱽᱜᱟᱹᱣ ᱛᱮ ᱥᱟᱱᱛᱤᱱᱤᱠᱮᱛᱚᱱ ᱟᱨ ᱜᱚᱥᱟᱵᱟ (ᱫᱚᱠᱷᱤᱱ ᱒᱔ ᱯᱚᱨᱜᱚᱱᱟ) ᱠᱷᱚᱱ INDUSTRIAL TRINING ᱠᱚᱨᱟᱣ ᱠᱟᱛᱮ ᱵᱟᱨᱤᱯᱟᱫᱟ ᱨᱮᱭᱟᱜ PURNA CHANDRA INDUSTRIAL TRINING INSTITUTE ᱨᱮ ᱥᱮᱪᱮᱫ ᱮᱢᱤᱡ ᱞᱮᱠᱟᱛᱮᱭ ᱵᱟᱦᱟᱞ ᱮᱱᱟ।

᱑᱙᱓᱓ ᱥᱟᱞᱨᱮ ᱟᱯᱟᱛ ᱠᱟᱹᱢᱤ ᱠᱷᱚᱱ ᱥᱟᱦᱟ ᱦᱳᱭᱮᱱ ᱛᱟᱭᱟ। ᱢᱮᱱᱠᱷᱟᱱ P.K. SEN ᱟᱜ ᱩᱫᱽᱜᱟᱹᱣ ᱛᱮ ᱵᱟᱫᱟᱢᱛᱚᱲᱤᱭᱟᱹ ᱢᱳᱰᱮᱞ ᱤᱥᱠᱩᱞ ᱨᱮ ᱢᱟᱨᱟᱝ ᱢᱟᱪᱮᱛ ᱞᱮᱠᱟᱛᱮᱭ ᱵᱟᱦᱟᱞᱤᱭ ᱮᱱᱟ। ᱑᱙᱓᱖ ᱥᱟᱞᱨᱮ ᱟᱭᱟᱜ 'ᱧᱮᱞ ᱡᱚᱝ ᱞᱟᱹᱜᱤᱫ ᱚᱞ' ᱟᱨ 'ᱦᱚᱨ ᱥᱮᱨᱮᱧ' ᱧᱩᱛᱩᱢᱟᱱ ᱵᱟᱨᱭᱟ ᱯᱚᱛᱚᱵ ᱮ ᱚᱞ ᱠᱮᱫᱟ। ᱟᱨ ᱟᱹᱫᱤᱵᱟᱥᱤ ᱞᱟᱠᱪᱟᱨ 'ᱪᱷᱟᱯᱟ' ᱮ ᱵᱮᱨᱮᱫ ᱠᱮᱫᱟ। ᱑᱙᱓᱘ ᱥᱟᱞᱨᱮ ᱠᱟᱴ ᱨᱮᱭᱟᱜ 'ᱪᱷᱟᱯᱟ ᱢᱮᱥᱤᱱ' ᱮ ᱛᱮᱭᱟᱨ ᱠᱮᱫᱟ।

ᱟᱨ ᱠᱟᱴ ᱨᱮᱭᱟᱜ ᱚᱞ ᱪᱤᱠᱤ ᱦᱚᱸᱭ ᱵᱮᱟᱱᱟᱣ ᱠᱮᱫᱟ। ᱑᱙᱓᱙ ᱥᱟᱞᱨᱮ ᱵᱟᱨᱤᱯᱟᱫᱟ ᱨᱮ ᱢᱤᱫ ᱯᱚᱨᱚᱵ ᱨᱮ ᱟᱭᱟᱜ ᱛᱤ ᱛᱮ ᱵᱮᱱᱟᱣ ᱠᱟᱴ ᱨᱮᱭᱟᱜ ᱪᱷᱟᱯᱟ ᱠᱚᱞ ᱥᱚᱫᱚᱨ ᱠᱮᱫᱟᱭ। ᱥᱚᱫᱚᱨ ᱠᱟᱹᱢᱤ ᱨᱮ ᱟᱸᱜᱤᱵᱷᱟᱨ ᱫᱚ ᱯᱟᱲᱟᱣ ᱞᱮᱱ ᱛᱟᱭᱟ ᱟᱡ ᱢᱟᱢᱟ ᱥᱟᱶᱱᱟ ᱢᱩᱨᱢᱩ ᱪᱮᱛᱟᱱ। ᱱᱚᱰᱮ ᱜᱮ ᱯᱚᱸᱰᱮᱛ ᱨᱟᱹᱜᱷᱩᱱᱟᱛᱷ ᱢᱩᱨᱢᱩ ᱥᱟᱶᱛᱮ ᱥᱟᱶᱱᱟ ᱢᱩᱨᱢᱩ, ᱥᱩᱱᱟᱹᱨᱟᱢ ᱢᱩᱨᱢᱩ, ᱥᱟᱶᱛᱮ ᱟᱭᱢᱟ ᱦᱚᱲ ᱢᱤᱫ ᱥᱟᱶᱛᱮ ᱵᱟᱨᱤᱯᱟᱫᱟ ᱨᱟᱡᱽ ᱰᱚᱨᱵᱟᱨ ᱨᱮ ᱢᱚᱦᱟᱨᱟᱡᱟ ᱯᱨᱚᱛᱟᱯ ᱪᱚᱱᱫᱨᱚ ᱵᱷᱚᱧᱡᱚᱫᱮᱣ ᱴᱷᱮᱱ ᱪᱟᱞᱟᱣ ᱠᱟᱛᱮ 'ᱚᱞ ᱪᱤᱠᱤ' ᱨᱮᱭᱟᱜ ᱦᱮᱲᱮᱢ ᱨᱟᱥᱟ ᱠᱚ ᱟᱸᱲᱛᱤ ᱟᱫᱮ ᱛᱟᱸᱦᱮᱫ।

ᱤᱱᱟᱹ ᱛᱟᱭᱱᱚᱢ ᱜᱩᱨᱩ ᱜᱚᱢᱠᱮ ᱫᱚᱭ ᱟᱸᱜᱚᱡᱽ ᱧᱟᱢ ᱞᱮᱫᱟ ᱡᱮ ᱛᱤᱱ ᱫᱷᱟᱵᱤᱡ ᱟᱵᱚᱣᱟᱜ ᱯᱟᱹᱨᱥᱤ, ᱥᱟᱶᱦᱮᱫ, ᱵᱟᱝᱵᱚᱱ ᱞᱟᱦᱟ ᱫᱟᱲᱮᱭᱟᱜᱼᱟ ᱩᱱ ᱫᱷᱟᱹᱵᱤᱡ ᱫᱚ ᱠᱷᱮᱨᱚᱣᱟᱞ ᱥᱟᱶᱛᱟ ᱨᱮᱭᱟᱜ ᱞᱟᱦᱟᱱᱛᱤ ᱫᱚ ᱵᱟᱝ ᱜᱮ ᱦᱳᱜ ᱫᱟᱲᱮᱭᱟᱜᱼᱟ। ᱚᱱᱟᱛᱮ ᱩᱱ ᱚᱠᱛᱚᱭ ᱢᱮᱱ ᱠᱮᱫᱟ।

ᱡᱟᱱᱟᱢ ᱯᱟᱹᱨᱥᱤ ᱨᱮᱭᱟᱜ ᱦᱟᱢᱟᱞ ᱫᱤᱥᱟᱹ ᱠᱟᱛᱮ ᱟᱨ ᱦᱚᱸᱭ ᱢᱮᱱ ᱠᱮᱫᱟ।

ᱯᱚᱸᱰᱮᱛ ᱨᱟᱹᱜᱷᱩᱱᱟᱛᱷ ᱢᱩᱨᱢᱩ ᱫᱚ ᱟᱹᱰᱤ ᱜᱟᱱ ᱯᱩᱛᱷᱤ ᱠᱚᱭ ᱚᱞ ᱦᱚᱴᱚ ᱟᱠᱟᱫᱟᱭ। ᱚᱱᱟ ᱠᱚᱜᱮ ᱞᱟᱛᱟᱨ ᱨᱮ ᱚᱞ ᱮᱱᱟ।

᱑) ᱦᱚᱨ ᱥᱮᱨᱮᱧ (᱑᱙᱓᱖)

᱒) ᱵᱤᱫᱩᱼᱪᱟᱸᱫᱟᱱ ᱜᱟᱭᱟᱱ (᱑᱙᱔᱒)

᱓) ᱧᱮᱞ ᱡᱚᱝ ᱞᱟᱹᱜᱤᱫ ᱚᱞ (᱑᱙᱓᱖)

᱔) ᱚᱞ ᱪᱮᱢᱮᱫ

᱕) ᱫᱟᱲᱮ ᱜᱮ ᱫᱷᱚᱱ ᱜᱟᱭᱟᱱ (᱑᱙᱔᱘)

᱖) ᱠᱷᱮᱨᱚᱣᱟᱲ ᱵᱤᱨ ᱜᱟᱭᱟᱱ

᱗) ᱚᱞ ᱩᱯᱩᱨᱩᱢ (᱑᱙᱕᱔) ᱘) ᱵᱟᱦᱟ ᱥᱮᱨᱮᱧ (᱑᱙᱕᱔)

᱙) ᱦᱤᱛᱟᱹᱞ (᱑᱙᱖᱖) ᱯᱟᱹᱦᱤᱞ, ᱫᱚᱥᱟᱨ

᱑᱐) ᱮᱞᱠᱷᱟ (᱑᱙᱖᱖)

᱑᱑) ᱞᱟᱠᱪᱟᱨ ᱥᱮᱨᱮᱧ

᱑᱒) ᱵᱟᱠᱷᱮᱬ (᱑᱙᱖᱗)

᱑᱓) ᱯᱟᱹᱨᱥᱤ ᱤᱛᱩᱱ (᱑᱙᱖᱘)

᱑᱔)ᱨᱚᱱᱚᱲ (᱑᱙᱗᱖)

᱑᱕) ᱯᱟᱹᱨᱥᱤ ᱚᱯᱟᱫ (᱑᱙᱙᱒)

᱑᱖) ᱥᱤᱫᱩᱼᱠᱟᱱᱦᱩ ᱦᱩᱞ ᱜᱟᱭᱟᱱ (᱑᱙᱙᱖)

᱑᱗) ᱚᱞ ᱤᱛᱟᱹ

᱑᱘) ᱨᱟᱜ ᱟᱸᱫᱳᱲ

ᱯᱟᱹᱨᱥᱤ, ᱥᱟᱶᱦᱮᱫ, ᱦᱟᱨᱟ ᱵᱩᱨᱩ ᱞᱟᱜᱤᱫ ᱛᱮ ᱯᱚᱸᱰᱮᱛ ᱨᱟᱹᱜᱷᱩᱱᱟᱛᱷ ᱢᱩᱨᱢᱩ ᱫᱚ ᱪᱟᱠᱨᱤ ᱦᱚᱸ ᱵᱟᱜᱤ ᱦᱳᱭ ᱞᱮᱱ ᱛᱟᱭᱟ। 'ᱚᱞ ᱪᱤᱠᱤ' ᱯᱟᱥᱱᱟᱣ ᱞᱟᱹᱜᱤᱫ ᱛᱮ ᱪᱮᱞᱟ ᱦᱚᱸᱭ ᱵᱮᱱᱟᱣ ᱵᱮᱱᱟᱣ ᱞᱮᱫ ᱠᱚᱣᱟ। ᱫᱤᱥᱚᱢ ᱫᱤᱥᱚᱢ ᱫᱟᱸᱲᱟ ᱠᱟᱛᱮ 'ᱚᱞ ᱪᱤᱠᱤ' ᱠᱚ ᱯᱟᱥᱱᱟᱣ ᱞᱮᱫᱟ।

ᱯᱚᱸᱰᱮᱛ ᱨᱟᱹᱜᱷᱩᱱᱟᱛᱷ ᱢᱩᱨᱢᱩ ᱟᱜ ᱩᱭᱦᱟᱹᱨ ᱛᱟᱦᱮᱸ ᱠᱟᱱ ᱛᱟᱭᱟ ᱥᱟᱱᱟᱢ ᱟᱹᱫᱤᱵᱟᱹᱥᱤ ᱜᱟᱸᱛᱟᱠ ᱨᱮᱱ ᱦᱚᱲ ᱠᱚ ᱢᱩᱫᱽ ᱨᱮ ᱡᱩᱢᱤᱫ ᱟᱹᱜᱩ ᱨᱮᱭᱟᱜ ᱞᱟᱠᱛᱤ ᱢᱮᱱᱟᱜ ᱟᱠᱟᱫᱟ। ᱚᱱᱟᱛᱮ ᱑᱙᱐᱖ ᱥᱟᱞ ᱠᱷᱚᱱ ᱑᱙᱖᱗ ᱥᱟᱞ ᱢᱩᱫᱽ ᱯᱚᱪᱷᱤᱢ ᱵᱟᱝᱞᱟ, ᱵᱤᱦᱟᱨ (ᱡᱷᱟᱲᱠᱷᱚᱸᱰ), ᱩᱰᱤᱥᱥᱟ ᱯᱚᱱᱚᱛ ᱨᱮᱭ ᱵᱮᱨᱫ ᱞᱮᱫᱟ 'ᱟᱹᱫᱤᱵᱟᱹᱥᱤ ᱥᱟᱶᱛᱟ ᱥᱮᱪᱮᱫ ᱞᱟᱠᱪᱟᱨ ᱥᱮᱢᱞᱮᱫ'।

᱑᱙᱗᱗ ᱥᱟᱞ ᱨᱮᱭᱟᱜ ᱒᱐ ᱯᱮᱵᱨᱩᱟᱨᱤ ᱢᱟᱺᱦᱤᱛ ᱨᱮ ᱢᱮᱱᱚᱜ ᱢᱤᱫᱤᱱᱯᱩᱨ ᱡᱤᱞᱟᱹ, ᱡᱷᱟᱲᱜᱨᱟᱢ ᱥᱳᱨ ᱨᱮ ᱢᱮᱱᱟᱜ ᱵᱮᱸᱛᱠᱩᱸᱫᱽᱨᱤ ᱰᱟᱦᱤ ᱨᱮ 'ᱥᱟᱱᱛᱟᱲᱤ ᱡᱮᱜᱮᱫ ᱵᱤᱫᱫᱟᱹᱜᱟᱲ' ᱵᱮᱱᱟᱣ ᱞᱟᱹᱜᱤᱫ ᱛᱮ ᱫᱷᱤᱨᱤᱭ ᱛᱷᱟᱯᱚᱱ ᱦᱚᱴᱚ ᱟᱠᱟᱫᱟ।

ᱱᱚᱝᱠᱟ ᱜᱮ ᱟᱭᱢᱟ ᱴᱷᱟᱶ ᱨᱮ ᱥᱮᱨᱢᱟ ᱯᱩᱨᱟᱹᱣ ᱢᱤᱫᱩᱱ ᱠᱚᱨᱮ ᱥᱮᱴᱮᱨ ᱠᱟᱛᱮ 'ᱚᱞ ᱪᱤᱠᱤ' ᱦᱟᱨᱟ ᱵᱩᱨᱩ ᱟᱨ ᱥᱟᱱᱛᱟᱲᱤ ᱯᱟᱹᱨᱥᱤ , ᱥᱟᱶᱦᱮᱫ ᱞᱟᱦᱟᱱᱛᱤ ᱞᱟᱹᱜᱤᱫ ᱛᱮ ᱫᱤᱥᱼᱦᱩᱫᱤᱥ ᱠᱚᱭ ᱮᱢ ᱦᱚᱴᱚ ᱟᱠᱟᱫᱟ ᱟᱨ ᱟᱹᱰᱤ ᱜᱟᱱ ᱪᱮᱞᱟ ᱦᱚᱸᱭ ᱵᱮᱱᱟᱣ ᱦᱚᱴᱚ ᱟᱠᱟᱫ ᱵᱚᱱᱟ।

ᱯᱚᱸᱰᱮᱛ ᱨᱟᱹᱜᱷᱩᱱᱟᱛᱷ ᱢᱩᱨᱢᱩ ᱟᱜ ᱠᱟᱹᱢᱤ ᱛᱮ ᱨᱟᱹᱥᱠᱟᱹ ᱦᱚᱪᱚ ᱠᱷᱟᱹᱛᱤᱨ ᱟᱹᱰᱤᱜᱟᱱ ᱦᱚᱲ ᱠᱚᱴᱷᱮᱱ ᱜᱩᱱ ᱢᱟᱱᱟᱣ , ᱧᱩᱢ ᱦᱟᱞᱟᱝ ᱟᱨ ᱥᱤᱨᱯᱟᱹ ᱦᱚᱸᱭ ᱧᱟᱢ ᱟᱠᱟᱫᱟ। ᱩᱰᱤᱥᱥᱟ ᱟᱹᱫᱤᱵᱟᱹᱥᱤ ᱢᱚᱦᱟᱥᱚᱵᱷᱟ ᱦᱚᱛᱮᱛᱮ ᱱᱩᱭ ᱫᱚ 'ᱜᱩᱨᱩ ᱜᱚᱢᱠᱮ' ᱢᱮᱱᱛᱮ ᱧᱩᱢ ᱣᱟᱞᱟᱝ ᱟᱠᱟᱱᱟᱭ। Mr. M.D. Julious Tidge ᱫᱚ "Great inventor and Dramatist" ᱧᱩᱛᱩᱢ ᱛᱮᱭ ᱧᱩᱢ ᱦᱟᱞᱟᱝ ᱟᱠᱟᱫᱮᱭᱟ।

ᱫᱷᱩᱢᱠᱩᱨᱤᱭᱟᱹ , ᱨᱟᱸᱪᱤ , ᱧᱩᱛᱩᱢᱟᱱ ᱜᱟᱶᱛᱟ ᱫᱚ 'Doctorate in Literature' ᱢᱟᱹᱱ ᱮ ᱪᱟᱞ ᱠᱟᱣ ᱫᱮᱭᱟ। ᱟᱹᱫᱤᱵᱟᱹᱥᱤ ᱢᱚᱦᱟᱥᱚᱵᱷᱟ ᱨᱮᱱᱤᱢ ᱥᱤᱨᱡᱚᱱᱤᱭᱟᱹ ᱢᱟᱱᱚᱛᱟᱱ ᱡᱚᱭᱯᱟᱞ ᱥᱤᱝ ᱜᱚᱢᱠᱮ ᱫᱚ 'ᱯᱚᱸᱰᱮᱛ' ᱢᱮᱱᱛᱮ ᱪᱟᱞ ᱠᱟᱣᱫᱮᱭᱟ। ᱩᱱ ᱠᱷᱚᱱ ᱜᱮ ᱨᱟᱹᱜᱷᱩᱱᱟᱛᱷ ᱢᱩᱨᱢᱩ ᱫᱚᱭ ᱧᱩᱢ ᱦᱟᱞᱟᱝ ᱚᱜ ᱠᱟᱱᱟ।

ᱱᱨᱤᱛᱚᱛᱛᱚᱵᱤᱫ ᱪᱟᱨᱩᱞᱟᱞ ᱢᱩᱠᱷᱟᱨᱡᱤ ᱜᱚᱢᱠᱮ ᱫᱚ 'Priest of Tribes' ᱢᱮᱱᱛᱮᱭ ᱪᱷᱟᱹᱴᱭᱟᱹᱨ ᱟᱠᱟᱫᱮᱭᱟᱭ। ᱩᱰᱤᱥᱥᱟ ᱯᱚᱱᱚᱛ ᱨᱮᱱᱤᱡ ᱵᱚᱸᱜᱟ ᱛᱟᱞᱟ ᱟᱠᱟᱱ ᱢᱚᱛᱨᱤ ᱢᱟᱱᱚᱛᱟᱱ ᱨᱟᱢᱡᱤᱛ ᱥᱤᱝ ᱵᱟᱨᱦᱟ ᱫᱚ 'A Great Orator with Charming Voice' ᱢᱮᱱᱛᱮᱭ ᱧᱩᱢ ᱦᱟᱞᱟᱝ ᱟᱠᱟᱫᱮᱭᱟ।

California University ᱨᱮᱱᱤᱡ ᱢᱟᱦᱟᱢᱟᱪᱮᱛ Martin Orence ᱫᱚ 'Spiritual Guru' ᱢᱮᱱᱛᱮᱭ ᱪᱷᱟᱹᱴᱭᱟᱹᱨ ᱟᱠᱟᱫᱟ। ᱑᱙᱗᱘ ᱥᱟᱞ ᱨᱮᱭᱟᱜ ᱓ ᱢᱟᱨᱪ ᱢᱺᱦᱤᱛ ᱦᱤᱞᱚᱜ ᱤᱰᱤᱥᱥᱟ ᱥᱟᱦᱤᱛᱛᱚ ᱮᱠᱟᱰᱮᱢᱤ ᱯᱚᱸᱰᱮᱛ ᱨᱟᱹᱜᱷᱩᱱᱟᱛᱷ ᱢᱩᱨᱢᱩ ᱫᱚ 'Founder of santhali Language, Literature and OL CHIKI SCRIPT' ᱧᱩᱛᱩᱢ ᱛᱮ ᱢᱟᱹᱱᱮ ᱪᱟᱞ ᱠᱟᱣ ᱫᱮᱭᱟ।

ᱯᱚᱪᱷᱤᱢ ᱵᱟᱝᱞᱟ ᱨᱮᱱᱤᱡ ᱢᱩᱠᱠᱷᱚ ᱢᱚᱱᱛᱨᱤ ᱢᱟᱱᱚᱛᱟᱱ ᱡᱳᱛᱤ ᱵᱟᱥᱩ ᱫᱚ ᱱᱚᱣᱟ ᱯᱚᱱᱚᱛ ᱥᱚᱨᱠᱟᱨ ᱯᱟᱦᱟᱴᱟ ᱠᱷᱚᱱ ᱑᱙᱗᱙ ᱥᱟᱞᱨᱮ 'ᱚᱞ ᱪᱤᱠᱤ' ᱦᱚᱸᱭ ᱵᱟᱛᱟᱣ ᱥᱟᱹᱨᱤ ᱟᱠᱟᱫᱟᱭ ᱟᱨ ᱛᱟᱢᱵᱟ ᱨᱮᱭᱟᱜ ᱥᱟᱠᱟᱢ ᱨᱮ ᱚᱞ ᱟᱠᱟᱱ ᱢᱟᱹᱱ ᱥᱟᱠᱟᱢ ᱦᱚᱸᱭ ᱪᱟᱞ ᱠᱟᱣᱫᱮᱭᱟ ᱯᱩᱨᱩᱞᱤᱭᱟᱹ ᱡᱤᱞᱟᱹ ᱨᱮ ᱢᱮᱱᱟᱜ ᱦᱩᱲᱟᱹ ᱛᱷᱟᱱᱟ ᱨᱮᱭᱟᱜ ᱠᱮᱸᱫᱽᱵᱚᱱᱟ ᱰᱟᱦᱤᱨᱮ।

ᱢᱩᱪᱟᱹᱫ ᱨᱮ ᱱᱚᱣᱟ ᱜᱮ ᱢᱮᱱ ᱜᱟᱱᱚᱜᱼᱟ ᱡᱮ ᱯᱚᱸᱰᱮᱛ ᱨᱟᱹᱜᱷᱩᱱᱟᱛᱷ ᱢᱩᱨᱢᱩ ᱫᱚ ᱥᱟᱱᱛᱟᱲᱤ ᱯᱟᱹᱨᱥᱤ ᱨᱮᱱᱤᱡ 'ᱥᱤᱧ ᱪᱟᱸᱫᱳ' ᱜᱮ ᱠᱟᱱᱟᱭ। ᱟᱨ 'ᱚᱞ ᱜᱩᱨᱩ' ᱦᱚᱸ ᱠᱟᱱᱟᱭ। ᱚᱱᱟ ᱥᱟᱶᱛᱮ ᱥᱟᱶᱛᱟ ᱥᱩᱥᱟᱹᱨᱤᱭᱟᱹ,ᱫᱤᱥᱚᱢ ᱫᱩᱞᱟᱹᱲᱤᱭᱟᱹ ᱦᱚᱸᱭ ᱛᱟᱸᱦᱮ ᱠᱟᱱᱟ। ᱟᱨ 'ᱚᱞ ᱪᱤᱠᱤ' ᱥᱤᱨᱡᱚᱱᱤᱭᱟᱹ ᱦᱚᱸ ᱠᱟᱱᱟᱭ। ᱟᱭᱟᱜ ᱱᱚᱣᱟ ᱠᱟᱹᱢᱤ ᱠᱷᱟᱹᱛᱤᱨ ᱠᱷᱮᱨᱚᱣᱟᱞ ᱥᱟᱶᱛᱟ ᱡᱟᱭᱡᱩᱜ ᱡᱤᱭᱟᱹᱲ ᱜᱮ ᱛᱟᱸᱦᱮᱱᱟ। ᱟᱨ ᱫᱷᱟᱨᱛᱤ ᱡᱟᱠᱟᱛ ᱢᱟᱱᱢᱤ ᱛᱟᱞᱟ ᱨᱮ ᱦᱚᱸ ᱡᱟᱭᱡᱩᱜ ᱜᱮ ᱩᱭᱦᱟᱹᱨ ᱮ ᱛᱟᱸᱦᱮᱱᱟ।